उदयपुर बेलका नगरपालिका -२ भागलपुरका १७ वर्षीय विशाल बस्नेतले युट्युबबाट पाए सिल्बर प्ले बटन

१७,जेठ बेलका / बेलका नगरपालिका–०२, उदयपुरका १७ वर्षीय विशाल बस्नेतले युट्युबबाट ‘सिल्भर बटन’ प्राप्त गरेका छन्। हाल कक्षा ११ मा अध्ययनरत विशालले विश्वका विभिन्न देशहरूका राजनैतिक मामलाहरूसम्बन्धि रमाइलो, मनोरञ्जनात्मक तथा सूचनामूलक भिडियोहरू निर्माण गर्दै आएका छन्।
उनको युट्युब च्यानलले १ लाखभन्दा बढी सदस्य संख्या (सब्सक्राइबर) पुरा गरेसँगै युट्युबले उनलाई उक्त अवार्ड प्रदान गरेको हो। सन् २०२२ मा सुरु गरेको च्यानललाई छोटो समयमै हजारौं दर्शकहरूले रुचाएका थिए। उनले भिडियोमा विशेषगरी विभिन्न देशको इतिहास, रोचक तथ्य, जीवनशैली र संस्कृतिलाई हास्यरस मिसाएर एनिमेटेड बलका रुपमा प्रस्तुत गर्ने गरेका छन्।
विशालले भने, “शुरुमा शौखका लागि बनाएको भिडियोले यति ठूलो सफलता दिलाउँछ भन्ने लागेको थिएन। आज यो सम्मान पाएपछि अझ प्रेरणा मिलेको छ।”
उनको यो उपलब्धिले केवल उनको व्यक्तिगत सफलतामात्र नभई बेलका क्षेत्रकै गौरव बढाएको छ। स्थानीय युवामाझ युट्युबमार्फत सिर्जनात्मक अभिव्यक्ति दिन सकिन्छ भन्ने प्रेरणा पनि मिलेको छ।
युट्युबको सिल्भर बटन, १ लाख सदस्य संख्या पुगेपछि प्रदान गरिने एक प्रतिष्ठित अवार्ड हो, जसले डिजिटल माध्यममा उल्लेखनीय योगदान गरेको संकेत गर्दछ।