बेलका, २३ भाद्र। जनता समाजवादी पार्टी, नेपाल “किरात राष्ट्रिय समितिको आयोजना एवं बेलका नगर कार्य समितिको व्यवस्थापनमा २ दिने अभिमुखी तथा प्रशिक्षण कार्यक्रम सम्पन्न भएको छ। बेलका नगरपालिका वडा नम्बर ८ डुम्रीबोटे स्थित एल. के. खोज रिसोर्टको भवनमा आज उक्त कार्यक्रम सम्पन्न भएको हो।
२ दिने अभिमुखी तथा प्रशिक्षण कार्यक्रमको दोस्रो दिन आज नेपाल सरकारका शिक्षा, बिज्ञान तथा प्रविधि मन्त्री माननीय अशोक कुमार राई, माननीय सांसद सुशिला श्रेष्ठ र पुर्व मन्त्री तथा जसपा नेपालका नेता रकम चेम्जोङले प्रशिक्षण गराउनु भएको थियो। प्रशिक्षण कार्यक्रमको पहिलो दिन (हिजो भदौ २२ गते) माननिय पुर्व मन्त्री तथा वर्तमान सांसद राज किशोर यादव, केन्द्रिय कार्यकारिणी समिति सदस्य द्वय पर्शुराम बस्नेत र रणध्वज कन्दङ्वाले विशेष प्रशिक्षण दिनु भएको थियो। कार्यक्रममा समसामयिक राजनीतिक परिस्थिति र हाम्रो कार्यभार, समानुपातिक समबेशी प्रतिनिधित्वको व्यवस्था, पार्टी निर्माणमा (जनवर्गीय संगठनको) भुमिका र पार्टी संगको अन्तर सम्बन्ध लगायत विभिन्न बिषयमा प्रशिक्षण गराउनु भएको थियो।
कार्यक्रममा जनता समाजवादी पार्टी, नेपालको विभिन्न तह र तप्काका नेतागण, किरात राष्ट्रिय समितिका पदाधिकारी, लिम्बुवान राष्ट्रिय समिति, शिल्पी, एवं विभिन्न जिल्लाका नेता, कार्यकर्ता र जसपा नेपाल बेलका नगर समितिको बृहत सहभागिता रहेको थियो। प्रशिक्षण कार्यक्रममा सहभागीहरुलाई उत्साहजनक बनाउन र थप ध्यानाकर्षण गराउनका लागि बीच बीचमा बिनि(मिनयुङ) राई ले नृत्य प्रस्तुत गरेकी थिइन भने शम्भु थापाले गीत गाएर मनोरञ्जन समेत प्रदान गरेका थिए।
किरात राष्ट्रिय समितिको अध्यक्ष रमेश राईको अध्यक्षतामा संचालन भएको उक्त कार्यक्रममा सचिव द्वय गोपाल राई र प्रसन्न कुमार राई ले कार्यक्रम संचालन गर्नु भएको थियो।
