अजम्बर पुलामी-
४ फागुन, बेलका / उदयपुरको बेलका नगरपालिकामा जारी पाँचौँ मेयर कप फुटबल प्रतियोगिताअन्तर्गत सोमबार एक खेल सम्पन्न भएको छ।
सोमबारको खेलमा बेलका वडा नम्बर २ ले वडा नम्बर ४ लाई ४-० गोल अन्तरले पराजित गर्दै सेमिफाइनलमा स्थान सुरक्षित गरेको छ।
वडा नम्बर २ का जर्सी नम्बर ७ का सञ्जोक विक, जर्सी नम्बर १० का प्रणय राई, जर्सी नम्बर ४ का सौगात राई र जर्सी नम्बर ११ का रोमन खत्रीले समान १-१ गोल गरे। खेलमा उत्कृष्ट प्रदर्शन गरेका दिवस राई म्यान अफ द म्याच घोषित भए।
“सबल आर्थिक, सामाजिक र भौतिक पूर्वाधार-बेलका नगर विकासको प्रमुख आधार” भन्ने मूल नारासहित बेलका-६ स्थित लेकाली रंगशाला खेलमैदानमा जारी प्रतियोगिता फागुन ९ गतेसम्म सञ्चालन हुनेछ।
प्रतियोगितामा ८ टिमको सहभागिता रहेको छ। विजेताले ५० हजार र उपविजेताले ३० हजार रुपैयाँ नगदसहित ट्रफी, मेडल र प्रमाणपत्र प्राप्त गर्नेछन्।
यो खेल संगै क्वाटरफाइनल चरण सकिएको छ भने भोलि सेमिफाइनलमा वडा नम्बर ८ र वडा नम्बर ९ बीच दिउँसो ३ बजे प्रतिस्पर्धा हुने आयोजकले जनाएको छ ।
