४ माघ, बेलका / सुनसरीको गढी-१ मा सञ्चालन भैरहेको चौथो मधेली भेट्रान कप फुटबल प्रतियोगितामा बेलका भेट्रान क्लब अर्को चरणमा प्रवेश गर्न सफल भएको छ।
आज सम्पन्न खेलमा बेलका भेट्रानले आयोजक मधेली भेट्रान ‘ए’ टिमलाई १-० गोलले पराजित गर्दै जित हात पारेको हो। बेलकाको जितमा जर्सी नम्बर ११ का रमेश राईले निर्णायक गोल गरेका थिए।
खेलअघि सहभागी टिमहरूलाई बेलका नगर खेलकुद विकास समितिका अध्यक्ष गोपिलाल राई, शिक्षा शाखा प्रमुख हरि कट्टेल तथा ब्रदरहुड क्लबका अध्यक्ष रबिन तामाङले बिदाइ तथा शुभकामना व्यक्त गर्नुभएको थियो।
सो अवसरमा बोल्दै खेलकुद विकास समितिका अध्यक्ष गोपिलाल राईले यस्ता प्रतियोगिताले आउँदो पुस्तालाई खेलकुदतर्फ सक्रिय र प्रेरित बनाउने विश्वास व्यक्त गर्नुभयो। उहाँले बेलकाको नाम खेलकुदको माध्यमबाट अझ चिनाउने लक्ष्यका साथ खेलाडीहरूलाई नगर खेलकुद समितिको तर्फबाट पूर्ण समर्थन रहने बताउनुभयो।
प्रतियोगितामा कुल १६ टिम सहभागी छन्। प्रतियोगिताको प्रथम पुरस्कार ५० हजार १ रुपैयाँ र दोस्रो पुरस्कार ३० हजार १ रुपैयाँ नगद रहेको छ।
बेलका भेट्रान टिमका क्याप्टेन सुकलाल चौधरी, टिम म्यानेजर भक्त खालिङ, कोच देविन मगरसहित खेलप्रेमीहरूको उपस्थिति रहेको थियो।
