अजम्बर पुलामी-
१२ बैशाख, बेलका / उदयपुर जिल्लाको बेलका नगर युवा तथा खेलकुद विकास समितिको आयोजनामा जिल्ला स्तरीय प्रथम मेयर कप तेक्वान्दो प्रतियोगिता २०८३ सफलतापूर्वक सम्पन्न भएको छ। प्रतियोगिता बेलका नगरपालिका-९ भचुवा स्थित कभर्डहलमा आयोजना गरिएको थियो।
बेलका नगरपालिकाका प्रमुख अशोक कार्कीको प्रमुख आतिथ्यतामा प्रतियोगिताको उद्घाटन गरिएको थियो। उद्घाटन समारोहमा उहाँले ब्यानर वाचन गर्दै खेलकुद विकासमा यस्ता प्रतियोगिताको महत्वपूर्ण भूमिका रहने बताउनुभयो।
प्रतियोगितामा कटारी नगरपालिका, त्रियुगा नगरपालिका, चौदण्डीगढी नगरपालिका र बेलका नगरपालिका गरी कुल १२५ जना खेलाडीहरुको सहभागिता रहेको थियो। पुरुषतर्फ १८ केजीदेखि ६० केजीसम्म तथा महिलातर्फ २० केजीदेखि ५० केजीसम्म तौल समूहमा प्रतिस्पर्धा सम्पन्न भएको थियो।
प्रतियोगितामा बेलका नगरपालिका “A” टिम प्रथम, चौदण्डीगढी नगरपालिका दोस्रो र बेलका नगरपालिका “B” टिम तेस्रो भएका छन्। विजेता टोलीहरुलाई शिल्ड, मेडल तथा प्रमाणपत्र प्रदान गरिएको थियो।
यस्तै, पुरुष सिनियर बेस्ट फाइटर बेलकाका सुमन्त श्रेष्ठ, जुनियरतर्फ कटारी नगरपालिकाका सुर्वण तामाङ घोषित भए। महिलातर्फ सिनियर बेस्ट फाइटर चौदण्डीगढी नगरपालिकाकी विपना राई र जुनियरतर्फ नमा तामाङ उत्कृष्ट घोषित भएका छन्।
प्रतियोगिताका क्रममा विभिन्न सहयोगी तथा संघसंस्थाका प्रतिनिधिहरुलाई मायाको चिनो सहित सम्मान गरिएको थियो।
कार्यक्रम बेलका नगर युवा तथा खेलकुद विकास समितिका अध्यक्ष गोपिलाल राईको अध्यक्षतामा सम्पन्न भएको थियो। कार्यक्रममा बेलका-४ र ९ का वडा अध्यक्ष तिर्थराज अधिकारी, भरत घिमिरे, नगर प्रमुखका स्वकीय सचिव मोहन कार्की, प्रेस संयोजक धुर्व प्रसाद कोइराला लगायत समाजसेवी, बुद्धिजीवी तथा खेलप्रेमीहरुको बाक्लो उपस्थिति रहेको थियो।
