२९ चैत, बेलका / ब्रदरहुड फुटबल क्लब उदयपुर, जारी नवौं गोलबजार मेयर गोल्डकप खुला नकआउट फुटबल प्रतियोगिताको फाइनलमा प्रवेश गरेको छ ।
शनिबार भएको दोस्रो सेमिफाइनलमा ब्रदरहुडले चात्या सा फुटबल क्लब, झापालाई पेनाल्टी शुटआउटमा ४–३ ले हराउँदै उपाधि नजिक पुग्न सफल भएको हो ।
त्यसअघि निर्धारित समयको प्रतिस्पर्धातमक खेल दुवै टोलीले २–२ गोलको बराबरी खेलेका थिए । निर्धारित समयतर्फ ब्रदरहुडका लागि रिचार्ड डेजेङवा र आकाश राईले गोल गरे भने चात्या साका लागि दुवै गोल शिशिर लेखीले गरेका थिए । यद्यपि पेनाल्टी शुटआउटमा ब्रदरहुडले नतिजा आफ्नो पक्षमा पार्यो ।
खेलमा ब्रदरहुडका गोलरक्षक सौरभ बराल प्लेयर अफ दि म्याच चुनिए । आज हुने फाइनल खेलमा सलहेश युवा क्लब, सिरहासँग उपाधिका लागि भिड्नेछ ।
गोलबजार नगरपालिका, गोलबजार, सिरहाको आयोजनामा जारी प्रतियोगिताको विजेताले उपाधिसहित नगद ४,४४,४४४ रुपैयाँ हात पार्नेछ भने उपविजेताले २,२२,२२२ रुपैयाँ प्राप्त गर्नेछ ।
