अजम्बर पुलामी-
६ फागुन, बेलका / उदयपुरको बेलका नगरपालिकामा जारी पाँचौँ मेयर कप फुटबल प्रतियोगिता २०८२ अन्तर्गत दोस्रो सेमिफाइनल खेलमा वडा नम्बर ३ विजयी भएको छ।
आज सम्पन्न खेलमा वडा नम्बर २ लाई २-० गोल अन्तरले पराजित गर्दै वडा नम्बर ३ फाइनलमा प्रवेश गरेको हो। वडा नम्बर ३ का हिमाल मगर र बिक्की मगरले समान एक-एक गोल गरे। उत्कृष्ट प्रदर्शन गर्दै जर्सी नम्बर ७ का हिमाल मगर म्यान अफ द म्याच घोषित भए। उनलाई नगद एक हजार रुपैयाँ प्रदान गरिएको आयोजकले जनाएको छ।
“सबल आर्थिक, सामाजिक र भौतिक पूर्वाधार-बेलका नगर विकासको प्रमुख आधार” भन्ने मूल नारासहित सञ्चालन भइरहेको प्रतियोगिता फागुन ९ गतेसम्म जारी रहनेछ। प्रतियोगितामा ८ टिमको सहभागिता रहेको छ।
उत्कृष्ट गोलकिपर, डिफेन्डर, मिडफिल्डर र सर्वाधिक गोलकर्तालाई जनही दुई हजार रुपैयाँसहित ट्रफी प्रदान गरिनेछ। प्रतियोगिताभर उत्कृष्ट र सर्वोत्कृष्ट खेलाडीलाई दुई हजार पाँच सय रुपैयाँ प्रदान गरिने आयोजकले जनाएको छ।
विजेताले ५० हजार तथा उपविजेताले ३० हजार रुपैयाँ नगदसहित ट्रफी, मेडल र प्रमाणपत्र प्राप्त गर्नेछन्।
अब फाइनल खेलमा वडा नम्बर ३ र वडा नम्बर ९ बीच शनिबार दिउँसो ३ बजेदेखि प्रतिस्पर्धा हुनेछ।
