अजम्बर पुलामी –
०२ फागुन, बेलका / उदयपुरको बेलका नगरपालिकामा “सबल आर्थिक, सामाजिक र भौतिक पूर्वाधार- बेलका नगर विकासको प्रमुख आधार” भन्ने मूल नाराका साथ जारी बेलका नगर स्तरीय नकआउट पाँचौँ मेयर कप फुटबल प्रतियोगिताको आजको खेलमा वडा नं ३ विजयी भएको छ।
बेलका-६ स्थित लेकाली रंगशाला खेलमैदानमा सम्पन्न खेलमा वडा नं ३ ले वडा नं १ लाई शून्यका विरुद्ध एक गोलले पराजित गर्दै सेमिफाइनलमा स्थान सुरक्षित गरेको हो। आजको खेलको म्यान अफ द म्याच वडा नम्बर ३ का जर्सी नं ११ का खेलाडी प्रवीण खड्का घोषित भएका छन्। प्रत्येक खेलको म्यान अफ द म्याचलाई नगद एक हजार रुपैयाँ प्रदान गरिँदै आएको छ।
प्रतियोगितामा उत्कृष्ट गोलकिपर, डिफेन्डर, मिडफिल्डर र सर्वाधिक गोलकर्तालाई जनही दुई हजार रुपैयाँसहित ट्रफी प्रदान गरिनेछ भने प्रतियोगिताभर उत्कृष्ट तथा सर्वोत्कृष्ट खेलाडीलाई दुई हजार पाँच सय रुपैयाँ प्रदान गरिने आयोजकले जनाएको छ।
यसैगरी, प्रतियोगिताको विजेताले नगद पचास हजार रुपैयाँसहित ट्रफी, मेडल र प्रमाणपत्र प्राप्त गर्नेछन् भने उपविजेताले नगद तीस हजार रुपैयाँसहित ट्रफी, मेडल र प्रमाणपत्र हात पार्नेछन्।
भोलि आइतबार हुने खेलमा वडा नम्बर ५ र वडा नम्बर ८ बीच दिउँसो तीन बजे प्रतिस्पर्धा हुने आयोजकले जानकारी दिएको छ। प्रतियोगिता फागुन ९ गतेसम्म सञ्चालन हुनेछ।
