भदौ ९, बेलका/ उदयपुरको बेलका नगरपालिका- ९ रामपुरस्थित श्री वरपिपल माध्यमिक विद्यालयमा कक्षा ११ का ५० जना नयाँ विद्यार्थीलाई स्वागत गर्ने कार्यक्रम सम्पन्न भएको छ ।
सोमबार कक्षा १२ का विद्यार्थीहरुले आयोजित कार्यक्रममा खादा र टीका लगाएर कक्षा ११ का विद्यार्थीलाई स्वागत गरिएको थियो । कार्यक्रमसँगै तीज विशेष सांस्कृतिक प्रस्तुति पनि राखिएको थियो ।
नयाँ विद्यार्थीलाई स्वागत गर्दै विद्यार्थीहरुले गीत, नृत्य लगायतका प्रस्तुति दिएका थिए । कार्यक्रममा विद्यालयका प्रिन्सिपल चन्द्र नारायण तामाङ प्रमुख अतिथि रहनु भएको थियो भने विद्यालय व्यवस्थापन समिति अध्यक्ष तथा वडा नम्बर ९ का वडा अध्यक्ष भरत घिमिरे विशेष अतिथि रहनु भएको थियो ।
त्यसैगरी सहायक प्रधानाध्यापक महेश पौडेल, मावि संयोजक शुकलाल चौधरी लगायतले स्वागत मन्तव्य राख्नुभएको थियो । कार्यक्रम कक्षा १२ की छात्रा अस्मिता दर्जीले सञ्चालन गरेकी थिइन् ।
