बेलका, असार ९ गते / “सबल आर्थिक, सामाजिक र भौतिक पूर्वाधार, बेलका नगर विकासको प्रमुख आधार” भन्ने मूल नाराका साथ बेलका नगरपालिकाको १६औं नगर सभा अधिवेशन आजबाट औपचारिक रूपमा सुरु भएको छ।
बेलका नगरपालिकाको सभा हलमा आयोजित कार्यक्रममा नगर प्रमुख अशोक कार्कीको अध्यक्षतामा नगर सभा सुरु गरिएको हो।
सो नगर सभामा उप-प्रमुख जिरा राई, निमित्त प्रमुख प्रशासकीय अधिकृत रविकिरण आचार्य विशिष्ट अतिथि रहनुभएको थियो।
नगरका सबै ९ वटा वडाबाट वडा अध्यक्ष, सदस्य, तथा कार्यपालिका सदस्यहरूको उपस्थिति रहेको अधिवेशनमा आगामी आर्थिक वर्ष २०८२/८३ का लागि नीति, कार्यक्रम तथा अनुमानित बजेट प्रस्तुत गरिने तयारी गरिएको छ।
कार्यक्रममा जनप्रतिनिधि, समाजसेवी, सञ्चारकर्मी, सुरक्षाकर्मी तथा विभिन्न क्षेत्रका नागरिकहरूको समेत सक्रिय सहभागिता रहेको थियो।
नगर प्रमुख कार्कीले आगामी बजेट जनताको आवश्यकता र स्थानीय स्तरको विकासलाई केन्द्रमा राखी प्रस्तुत गरिने जानकारी दिनुभयो।
