अजम्बर पुलामी-
२४ माघ, बेलका / साहित्यकार कुमार कोइरालाद्वारा लिखित चौथो कृति कथा सङ्ग्रह ‘सानू भाइ’ आज बेलका नगरपालिकाको सभा हलमा एक समारोहबीच विमोचन गरिएको छ।
उदयपुर साहित्यकला प्रतिष्ठानद्वारा प्रकाशित १ सय ८ पृष्ठको यस कथा सङ्ग्रहमा १५ वटा कथाहरू समेटिएका छन्। उदयपुर साहित्यकला प्रतिष्ठान उदयपुरको आयोजनामा सम्पन्न कार्यक्रममा प्रतिष्ठानका अध्यक्ष डा. कैलाश कुमार राईको अध्यक्षता रहेको थियो।
कार्यक्रमका प्रमुख अतिथि बेलका नगरपालिकाका नगर प्रमुख अशोक कार्की रहनु भएको थियो भने विशेष अतिथिमा त्रियुगा जनता बहुमुखी क्याम्पसका सह- प्राध्यापक रबिन्द्रराज शाही सहभागी हुनुहुन्थ्यो। साथै प्रतिष्ठानका महासचिव माधव पोखरेल गोज्याङ्गे, सचिव सरिता गुरागाई, जनप्रतिनिधि तथा स्वयं कृतिकारले संयुक्त रूपमा कृतिको विमोचन गर्नुभयो।
यसअघि कुमार कोइरालाका ‘जीवनका दुई थुङ्गा फूल’, ‘हामीले भोगेका ती दिन’ र ‘पहिलो भेट’ कृति प्रकाशित भइसकेका छन्। विमोचन समारोहमा आफ्नो कृति वाचन गर्दैगर्दा कथाकार कोइराला भावुक बन्नुभएको थियो।
कथाकार कुमार कोइराला बेलका नगरपालिकाको नगर गीतका रचनाकार समेत हुनुहुन्छ।
