२०माघ, बेलका / बेलका नगरपालिका-६ स्थित श्री गौरी सूर्योदय इङ्लिस बोर्डिङ स्कुलको आयोजनामा दोस्रो ‘जि.एस. कप २०८२’ आजदेखि हर्षोल्लासका साथ सुरु भएको छ। खेलकुदमार्फत विद्यार्थीहरूको प्रतिभा प्रस्फुटन गर्ने उद्देश्यले आयोजना गरिएको प्रतियोगिताको उद्घाटन विशेष समारोहका बीच सम्पन्न भएको हो।
उद्घाटन समारोहका प्रमुख अतिथि तथा गौरी सूर्योदय स्कुल व्यवस्थापन समितिका प्रतिनिधि अघम सिंह निरौलाले पानसमा बत्ती बालेर प्रतियोगिताको औपचारिक उद्घाटन गर्नुभयो। कार्यक्रममा बेलका नगरपालिका शिक्षा शाखाका प्रतिनिधि, बेलका-९ का वडा सदस्य, विद्यालय व्यवस्थापन समितिका पदाधिकारी, विभिन्न विद्यालयका शिक्षक तथा अभिभावकहरूको उपस्थिति रहेको थियो।
आज सम्पन्न चार खेलमध्ये पहिलो खेलमा मर्निङ ग्लोरीलाई पराजित गर्दै नर्थ स्टार ६७ रनको फराकिलो अन्तरले विजयी भयो। नर्थ स्टारका बिकु गुप्ताले १४ बलमा ३५ रनको उत्कृष्ट प्रदर्शन गरे।
दोस्रो खेलमा युनिक शिशु सदनले उदयपुर लिटल हेभनलाई ७ विकेटले पराजित गर्यो। ५८ रनको लक्ष्य युनिक शिशु सदनले ३ विकेट गुमाउँदै पूरा गरेको थियो।
तेस्रो खेलमा आयोजक गौरी सूर्योदयले हिम शिखरलाई ८ विकेटले पराजित गर्यो। ८५ रनको लक्ष्य गौरी सूर्योदयले मात्र ६ ओभरमा पूरा गरेको थियो। कप्तान देवेन्द्र परियारले अविजित ४६ रनको विस्फोटक ब्याटिङ गरे।
चौथो खेलमा रामपुर पब्लिकले बेलका आदर्शलाई ४५ रनले पराजित गर्यो। रामपुर पब्लिकका कप्तान मनिल बोहोराले ६५ रन बनाउँदै प्रतियोगिताकै उच्च व्यक्तिगत स्कोर तयार गरे।
आयोजकका अनुसार प्रतियोगिताका खेलहरू भोलि सञ्चालन हुनेछन् भने समापन समारोह पनि भोलिनै सम्पन्न गरिनेछ।
