अजम्बर पुलामी-
२८ कात्तिक, बेलका / उदयपुरको बेलका नगरपालिका-४ गुरुङ्ग चौरी स्थित श्री जनता नमुना माध्यमिक विद्यालयमा ९२ जना विद्यार्थीले तेक्वान्दोको सामूहिक डेमो प्रदर्शन गरेका छन्।
कार्यक्रममा विद्यार्थीहरूले आधारभूतदेखि उन्नत स्तरसम्मका किक्स, पोम्से र सेल्फ–डिफेन्सका विभिन्न प्रविधि प्रस्तुत गरेका हुन्। विद्यालयले विद्यार्थीको शारीरिक क्षमता, अनुशासन र आत्मविश्वास वृद्धि गर्ने उद्देश्यले तेक्वान्दो प्रशिक्षण सञ्चालन गर्दै आएको छ।
विद्यालय प्रशासनका अनुसार यस्तो गतिविधिले विद्यार्थीलाई खेलकुदप्रति थप प्रेरित गर्ने विश्वास लिइएको छ।
बेलका नगर खेलकुद विकास समितिद्वारा सञ्चालित आत्मरक्षा कार्यक्रम अन्तर्गत प्रशिक्षक प्रेम तिम्सिनाले उक्त प्रशिक्षण प्रदान गर्दै आएका छन्।
