२९ कात्तिक, बेलका / बेलका नगरपालिकामा सम्पन्न प्रथम बेलका भेट्रान फुटबल प्रतियोगिता–२०८२ को उपाधि मधेली भेट्रान FC ले उचालेको छ। शनिबार बेलका–६ स्थित लेकाली रंगशालामा भएको फाइनल खेलमा मधेली भेट्रान FC ले राजाबास भेट्रान FC लाई १–० गोल अन्तरले पराजित गर्दै उपाधि चुमेको हो।
बेलका भेट्रान फुटबल क्लबको आयोजनामा भएको उक्त खेल बिहान ८ बजे औपचारिक रुपमा सुरु भएको थियो। कार्यक्रमको संचालन बेलका भेट्रान क्लबका कोषाध्यक्ष भक्त खालिङ्गले गर्नुभएको थियो। खेलको अध्यक्षता क्लबका अध्यक्ष सुकलाल चौधरीले गर्नुभएको थियो भने प्रमुख अतिथि बेलका नगर युवा तथा खेलकुद विकास समितिका अध्यक्ष गोपिलाल राई रहनुभएको थियो। साथै नेकपा एमाले जिल्ला कमिटी सदस्य गणेश बस्नेत, जसपा बेलका नगर अध्यक्ष सुरेन्द्र खालिङ, नगर खेलकुद समितिका सचिव दिपेन राना, नगर प्रमुखको स्वकीय सचिव महोन कार्की, प्रेस संयोजक ध्रुव प्रसाद कोइराला, सरस्वती डेन्टल कियर सेन्टरका सञ्चालक शम्भु शाह, प्रहरी हवल्दार राम बहादुर कटुवाल, ब्रदरहुड फुटबल क्लबका अध्यक्ष रबिन तामाङ र बेलका एफएमका सहायक स्टेशन म्यानेजर कविता राईलगायतको उपस्थितिमा खेल सम्पन्न भएको हो।
प्रतियोगितामा बेलका भेट्रान FC, दुहबी भेट्रान FC, रामधुनी भेट्रान, मधेली भेट्रान FC, धरान कलेक्सन V.FC, राजाबास भेट्रान क्लब, चौदण्डी भेट्रान र बिराट भेट्रान क्लब गरी कुल ८ टिमले सहभागिता जनाएका थिए।
ब्रदरहुड फुटबल क्लबको विशेष सहयोग तथा बेलका युथ क्लबको सहयोगमा सम्पन्न प्रतियोगितामा विजयी मधेली भेट्रान FC ले नगद रु. २० हजारसहित ट्रफी, मेडल र प्रमाणपत्र प्राप्त गरेको छ भने उपविजेता राजाबास भेट्रान FC ले नगद रु. १० हजारसहित ट्रफी, मेडल र प्रमाणपत्र हात पारेको छ।
“फिट रहौं, खेल्दै रहौं, प्रेरणा बाँड्दै रहौं” भन्ने नाराका साथ आयोजित प्रतियोगिताले भेट्रान खेलाडीहरूबीच आपसी सम्बन्ध सुदृढ गर्नेमा आयोजकले विश्वास व्यक्त गरेको छ।
