अजम्बर पुलामी-
३ जेष्ठ, बेलका / उदयपुरको बेलका नगरपालिकामा प्रथम जिल्ला स्तरीय मेयर-उपमेयर कप ब्याडमिन्टन प्रतियोगिता २०८३ आयोजना हुने भएको छ । आइतबार बेलका ब्याडमिन्टन कभर्डहलमा आयोजित पत्रकार सम्मेलनमार्फत आयोजकले प्रतियोगिताबारे जानकारी गराएको हो ।
बेलका ब्याडमिन्टन क्लब रामपुरको आयोजनामा, बेलका नगर खेलकुद विकास समिति को सह-आयोजनामा, बेलका नगरपालिकाको मुख्य सहयोगी तथा सरस्वती डेन्टल केयर सेन्टर प्रालिको प्रायोजकमा यहीँ जेठ १५ गतेदेखि १७ गतेसम्म भचुवास्थित बेलका ब्याडमिन्टन कभर्डहलमा प्रतियोगिता सञ्चालन गरिने क्लबका अध्यक्ष खड्ग पाखृनले जानकारी दिए ।
प्रतियोगितामा मेन्स डबल “B” जिल्ला स्तरीय, मेन्स डबल भेट्रान्स ४५ प्लस जिल्ला स्तरीय, मेन्स डबल युवा समूह अन्तर-बेलका नगरपालिका तथा सुपर भेट्रान्स ५० प्लस अन्तर-बेलका नगरपालिका स्तरीय र खुल्ला महिला जिल्ला स्तरीय गरी विभिन्न विधामा खेल सञ्चालन गरिने जनाइएको छ ।
मेन्स डबल “B” समूहका प्रथम, द्वितीय र तृतीय हुने टोलीलाई क्रमशः २० हजार, १५ हजार र १० हजार रुपैयाँ नगद पुरस्कार प्रदान गरिनेछ । त्यसैगरी डबल भेट्रान्स ४५ प्लस मेन्सतर्फ प्रथम, द्वितीय र तृतीयलाई क्रमशः १२ हजार, १० हजार र ८ हजार रुपैयाँ पुरस्कार दिइनेछ ।
मेन्स डबल युवा समूहमा प्रथम, द्वितीय र तृतीय हुनेलाई क्रमशः ५ हजार, ४ हजार र ३ हजार रुपैयाँ प्रदान गरिनेछ भने सुपर भेट्रान्स ५० प्लस डबल्सतर्फ प्रथम, द्वितीय र तृतीयलाई क्रमशः ८ हजार, ६ हजार र ४ हजार रुपैयाँ पुरस्कार प्रदान गरिने आयोजकले जनाएको छ ।
सम्पूर्ण खेलहरू BWF/NBA को नियमअनुसार राष्ट्रिय एम्पायरद्वारा सञ्चालन गरिनेछ । खेलाडीहरू आफ्नो खेल सुरु हुनुभन्दा आधा घण्टा अगावै उपस्थित हुनुपर्ने नियम समेत आयोजकले जनाएको छ ।
पत्रकार सम्मेलनमा नगर प्रमुख अशोक कार्की, प्रमुख प्रशासकीय अधिकृत बिनोद भट्टराई लगायत खेलाडी तथा सरोकारवालाहरूको उपस्थिति रहेको थियो ।
