अजम्बर पुलामी-
५ फागुन, बेलका / उदयपुरको बेलका नगरपालिकामा जारी पाँचौँ मेयर कप फुटबल प्रतियोगिता २०८२ अन्तर्गत पहिलो सेमीफाइनल खेलमा वडा नम्बर ९ विजयी हुँदै फाइनलमा प्रवेश गरेको छ।
मंगलबार बेलका-६ स्थित लेकाली रंगशाला मा सम्पन्न खेलमा वडा नम्बर ८ र वडा नम्बर ९ बीच प्रतिस्पर्धा भएको थियो। खेलको बीचमा बेलका -९ ले ट्राईबेकर पाए पछि वडा नम्बर ९ ले १-० को अन्तरले जित हात पारेको हो।
खेलमा उत्कृष्ट प्रदर्शन गर्दै विजेता टिमका जर्सी नम्बर २१ का राहुल तामाङ म्यान अफ द म्याच घोषित भए। उनलाई नगद एक हजार रुपैयाँ प्रदान गरिएको आयोजकले जनाएको छ।
“सबल आर्थिक, सामाजिक र भौतिक पूर्वाधार- बेलका नगर विकासको प्रमुख आधार” भन्ने मूल नारासहित सञ्चालन भइरहेको प्रतियोगिता फागुन ९ गतेसम्म जारी रहनेछ।
खेलमा उत्कृष्ट गोलकिपर, डिफेन्डर, मिडफिल्डर र सर्वाधिक गोलकर्तालाई जनही दुई हजार रुपैयाँसहित ट्रफी प्रदान गरिनेछ भने प्रतियोगिताभर उत्कृष्ट तथा सर्वोत्कृष्ट खेलाडीलाई दुई हजार पाँच सय रुपैयाँ प्रदान गरिने आयोजकले जनाएको छ।
प्रतियोगितामा ८ टिमको सहभागिता रहेको छ। विजेताले ५० हजार र उपविजेताले ३० हजार रुपैयाँ नगदसहित ट्रफी, मेडल र प्रमाणपत्र प्राप्त गर्नेछन्।
भोलि हुने दोस्रो सेमीफाइनल खेलमा वडा नम्बर २ र वडा नम्बर ३ बीच प्रतिस्पर्धा हुनेछ। खेल बुधबार दिउँसो ३ बजेदेखि सुरु हुने आयोजकले जानकारी दिएको छ।
