अजम्बर पुलामी-
३ फागुन, बेलका / उदयपुरको बेलका नगरपालिकामा गौरवका रूपमा आयोजना हुँदै आएको पाँचौँ मेयर कप फुटबल प्रतियोगिताअन्तर्गत आज आइतबार एक खेल सम्पन्न भएको छ।
बेलका-६ स्थित लेकाली रंगशाला खेलमैदान मा भएको खेलमा वडा नम्बर ८ सोमबारेले वडा नम्बर ५ सुपाडेलाई ३-० गोल अन्तरले पराजित गर्दै सेमिफाइनलमा प्रवेश गरेको छ।
वडा नम्बर ८ का जर्सी नम्बर ५ का रोशन राईले दुई गोल तथा जर्सी नम्बर १७ का अमन मगरले एक गोल गर्दै टोलीलाई जित दिलाएका हुन्। उत्कृष्ट प्रदर्शन गर्दै रोशन राई आजको खेलका म्यान अफ द म्याच घोषित भएका छन्।
“सबल आर्थिक, सामाजिक र भौतिक पूर्वाधार-बेलका नगर विकासको प्रमुख आधार” भन्ने मूल नारासहित बेलका नगर युवा तथा खेलकुद विकास समितिको आयोजनामा सञ्चालन भइरहेको नगर स्तरीय नकआउट पाँचौँ मेयर कप फुटबल प्रतियोगिता २०८२ आगामी फागुन ९ गतेसम्म सञ्चालन हुनेछ।
प्रतियोगितामा नगरभित्रका आठ टोली सहभागी छन्। विजेता टोलीले ५० हजार रुपैयाँ नगदसहित मेडल, ट्रफी र प्रमाणपत्र प्राप्त गर्नेछ भने उपविजेताले ३० हजार रुपैयाँ नगदसहित मेडल, ट्रफी र प्रमाणपत्र पाउनेछन्।
त्यसैगरी उत्कृष्ट गोलकिपर, डिफेन्डर, मिडफिल्डर र सर्वाधिक गोलकर्तालाई जनही दुई हजार रुपैयाँसहित ट्रफी प्रदान गरिनेछ। प्रतियोगिताभर उत्कृष्ट र सर्वोत्कृष्ट खेलाडीलाई दुई हजार पाँच सय रुपैयाँ प्रदान गरिने आयोजकले जनाएको छ।
भोलि सोमबार वडा नम्बर २ र वडा नम्बर ४ बीच दिउँसो तीन बजे प्रतिस्पर्धा हुने आयोजकले जानकारी दिएको छ।
