अजम्बर पुलामी –
२४ माघ, बेलका / उदयपुरको बेलका नगरपालिकामा नेपाल खृष्टियन बाल शिक्षा संगति र बेलका खृष्टियन बाल शिक्षा संगतिको संयुक्त आयोजनामा सञ्चालित पहिलो महिला खेलकुद प्रतियोगिता आज सम्पन्न भएको छ।
हिजोदेखि जारी प्रतियोगिताको आज भएको फाइनल खेलमा बुद्ध बेलका क्लब र बेलका एकेडेमी “बि” बीच प्रतिस्पर्धा भएको थियो। निर्धारित समयमा खेल १-१ गोलको बराबरीमा टुंगिएपछि पेनाल्टी सुटआउटमार्फत बुद्ध बेलका क्लबले बेलका एकेडेमी “बि” लाई पछि पार्दै प्रतियोगिताको उपाधि जितेको हो।
समापन समारोहमा बेलका बाल शिक्षा संगतिकी अध्यक्ष सिमा राईको अध्यक्षतामा सम्पन्न भएको थियो। कार्यक्रममा प्रमुख अतिथिका रूपमा बेलका नगरपालिकाका नगर प्रमुख अशोक कार्की सहभागी हुनुहुन्थ्यो। साथै बेलका नगर युवा खेलकुद विकास समितिका अध्यक्ष गोपिलाल राई, प्रदेश निर्देशक पास्टर आकाश श्रेष्ठ, जिल्ला इसाई समाजका अध्यक्ष ललित राना लगायत विभिन्न मण्डलीका पास्टरहरूको उपस्थिति रहेको थियो।
प्रतियोगिता खेलको विजेता र उपविजेताको पुरस्कार राशी प्रायोजन गर्ने सहयोगीहरू, विभिन्न संघ-संस्था तथा प्रतियोगिताभर सहयोग गर्ने व्यक्तिहरूलाई मायाको चिनोसहित सम्मान गरिएको थियो। साथै उत्कृष्ट प्रदर्शन गर्ने खेलाडीहरूलाई पनि आयोजकले सम्मान गरेको छ।
प्रतियोगिताको विजेता बुद्ध बेलका क्लबले नगद १० हजार रुपैयाँसहित ट्रफी, मेडल र प्रमाणपत्र प्राप्त गरेको छ भने उपविजेता बेलका एकेडेमी “बि” ले नगद ७ हजार रुपैयाँसहित ट्रफी, मेडल र प्रमाणपत्र प्राप्त गरेको छ।
