६ मङ्सिर – बेलका। प्रथम मैनारानी गोल्ड कप फुटबल प्रतियोगिता २०८१ को उद्घाटन खेलमा पन्चकन्या फुटबल क्लबले बिजय सुरुवात गरेको छ। बेलका ८ मेखबारी खेल मैदानमा आज भएको उद्घाटन खेलमा बराहक्षेत्र फुटबल क्लब, सुनसरीलाई ० – १ गोल अन्तरले पराजित गर्दै पन्चकन्या फुटबल क्लब बेलका(आयोजक) ले बिजय सुरुवात गरेको हो।
पन्चकन्या फुटबल क्लबको तर्फबाट अशिम राई ले गोल गरेका थिए। आजको म्यान अफ दि म्याच अशिम राई नै घोषित भएका थिए।
कोशी प्रदेशका सामाजिक बिकास मन्त्री पिके राई को प्रमुख आतिथ्यतामा उद्घाटन भएको कार्यक्रममा बिशेष अतिथि कोशी प्रदेशका उप सभामुख सृजना दनुवार, बेलका नगर प्रमुख अशोक कार्की, चौदण्डिगढी नगर प्रमुख कालु लामा, बेलका नगर पुर्व प्रमुख दुर्गा कुमार थापा(स्वस्ती), गणेश बस्नेत साथै सुरक्षा निकाय, विभिन्न राजनीतिक दलका प्रमुख तथा प्रतिनिधि, समाजसेवी, बुद्धिजीवी, पत्रकार लगायत खेलाडी र खेलप्रेमीहरुको उपस्थिति रहेको थियो।
प्रतियोगिताको बिजेता टिमले नगद रु. १ लाख १ हजार साथमा ट्रफी, मेडल र प्रमाणपत्र हात पार्नेछन भने उप बिजेता टिमले नगद रु.५५ हजार सहित ट्रफी, मेडल र प्रमाणपत्र प्राप्त गर्नेछन। प्रत्येक खेलमा म्यान अफ दि म्याच साथै बिधागत तर्फ पनि पुरस्कार रहेको आयोजकले जनाएको छ।
पन्चकन्या फुटबल क्लब द्वारा आयोजित प्रथम मैनारानी गोल्ड कपमामा टेम्के फुटबल क्लब, धरान, न्यु त्रियुगा स्पोर्ट्स क्लब, फत्तेपुर, पन्चकन्या फुटबल क्लब, बेलका, बराहक्षेत्र फुटबल क्लब, सुन्सरी, गाईघाट फुटबल क्लब, उदयपुर, तालतलैया फुटबल क्लब, इटहरी सुन्सरी, बसाहा फुटबल क्लब, चौदण्डिगढी र एभरेस्ट फुटबल क्लब सुन्सरी गरि जम्मा ८ टिमको सहभागी रहेको छ। भोलिको खेल टेम्के फुटबल क्लब धरान, सुन्सरी र न्यु त्रियुगा स्पोर्ट्स क्लब फत्तेपुर बिच दिउँसो ३ बजेबाट खेल हुने आयोजकले बताएको छ।
स्थानीय स्तरमा रहेका खेलाडीहरुलाई अगाडि बढाउन र खेल क्षेत्रको बिकासमा टेवा पुर्याउन साथै स्थानीय स्तरमा रहेका पर्यटकीय क्षेत्रहरुको प्रचारप्रसार गर्न र पर्यटन प्रवर्द्धन गर्ने उद्देश्य मैनारानी गोल्ड कपको आयोजना गरेको संयोजक सुरेन्द्र चाम्लिङ राई ले बताए।
पन्चकन्या फुटबल क्लबका अध्यक्ष आशिष संगम राई को अध्यक्षतामा औपचारिक कार्यक्रम भएको थियो भने धरानकि चिरपरिचित कुशल उद्घोषिका सन्जु राई ले कार्यक्रम संचालन गर्नु भएको थियो।
