१३ कार्तिक – बेलका। उदयपुरको बेलका नगरपालिका ६ बुद्ध चोक खेल मैदानमा कोशी प्रदेश स्तरीय तेस्रो मेयर कप खुल्ला पुरुष भलिबल प्रतियोगिता २०८१ सुरु भएको छ। बेलका नगर युवा तथा खेलकुद बिकास समिति द्वारा आयोजित तेस्रो मेयर कप बेलका नगर प्रमुख अशोक कार्कीको प्रमुख आतिथ्यतामा आजबाट सुरु भएको हो।
खेलकुद बिकास समितिका अध्यक्ष गोपीलाल राई को अध्यक्षतामा आज भएको उद्घाटन कार्यक्रममा वडा नं. ४ का वडा अध्यक्ष तिर्थराज अधिकारी ६ का वडा अध्यक्ष बसन्त कुमार मगर, बेलका नगर निमित्त प्रमुख प्रशासकीय अधिकृत, स्थानीय राजनितीक दलका प्रमुख तथा प्रतिनिधिहरु, कोशी प्रदेश भलिवल प्रशिक्षक, भलिवल संयोजकहरु लगायत खेलाडी तथा खेलप्रेमीहरुको उपस्थिति रहेको थियो।
आजको उद्घाटन खेलमा आयोजक (बि) बेलका नगरपालिका उदयपुरले २५-१२ र २५-११ को सोझो सेटमा बराहक्षेत्र नगरपालिका सुनसरीलाई पराजित गर्दै बेलका “बि” (आयोजक) अर्को चरणमा प्रवेश गरेको छ। प्रतियोगितामा बराहक्षेत्र नगरपालिका सुनसरी, बराह पोखरी गाउँपालिका खोटाङ, आमचोक गाउँपालिका भोजपुर, बेलबारी गाउँपालिका मोरङ, बाङ्गे भलिबल क्लब, धरान उपमहानगरपालिका सुन्सरी, आयोजक ‘ए’ र ‘बि’ गरि जम्मा १० टिमको सहभागी रहेको आयोजक भलिबल संयोजक नबिन राई ले बताए।
“स्वास्थ्यको लागि खेलकुद , राष्ट्रको लागि खेलकुद” भन्ने मुख्य नाराका साथ आयोजित यस प्रतियोगिताको प्रथम बिजेताले नगद रु.१ लाख सहित ट्रफी, मेडल र प्रमाणपत्र हात पार्ने छन भने उप बिजेता टिमले नगद रु.५० हजार सहित ट्रफी, मेडल र प्रमाणपत्र हात पार्ने छन।
आज कार्तिक १३ गते सुरु भएको प्रतियोगिता १५ गते फाइनल हुने बेलका खेलकुद बिकास समितिका अध्यक्ष गोपिलाल राई ले बताए। बेलका नगरपालिकाको मुख्य प्रायोजकमा आयोजित यस प्रतियोगिताको आजको उद्घाटन कार्यक्रम बेलका खेलकुद बिकास समितिका सचिब दिपेन राना मगर ले संचालन गरेकी थिए। अरु खेल भोलि १४ गते बिहान ८ बजेबाट हुने छ भने सबै खेलको प्रत्यक्ष प्रसारण (लाइभ) यसै रेडियो बेलका एफ.एम. को पेजबाट हुने छ।
