५ भदौ २०८१-बेलका -उदयपुरमा ट्याक्टर दुर्घटना हुँदा चालकको मृत्यु भएको छ । जिल्ला प्रहरी कार्यालय उदयपुरका अनुसार, सुनसरीको इटहरीबाट निर्माण सामग्री लिएर उदयपुरको बेलका नगरपालिका वडा नम्बर २ तर्फ जाँदै गरेको को २ त ६३४९ नम्बरको ट्याक्टर चौदण्डीगढी नगरपालिका–३ हात्तीसारमा पल्टिँदा चालक तिलक राईको घटनास्थलमै मृत्यु भएको हो ।
फलामको ट्युब लोड गरिएको ट्याक्टर ओरालोमा अनियन्त्रित भएर दुर्घटना भएको आशंका गरिएको छ । ट्याक्टरमा बसेका अन्य दुई जना घाइते भएका छन् । उनीहरूलाई स्थानीय नगर अस्पतालमा भर्ना गरिएको छ ।
इटहरीबाट करिब ३५ किलोमिटरको दूरीमा रहेको बेलका ९ रामपुरहुँदै वडा नम्बर २ तर्फ जाँदा बर्खामा गिँदेरी खोलाले अवरोध गर्ने भएकाले अर्को पालिकाको बाटो प्रयोग गरेर जानुपर्ने स्थानीयको बाध्यता छ । उक्त खोलामा बन्दाबन्दै पुल अलपत्र परेको वर्षौं भइसकेको छ ।
