बेलका, १६ असार।
उदयपुरको बेलका नगरपालिकामा बेलका नगर स्तरीय प्रथम मेयर कप ब्याडमिन्टन प्रतियोगिता २०८० भब्यता साथ सम्पन्न भएको छ। बेलका नगर युवा तथा खेलकुद बिकास समितिको आयोजना र बेलका नगरपालिकाको सहयोगमा बेलका नगरपालिका ९ भचुवा स्थित नवनिर्मित कभर्डहलमा उक्त प्रतियोगिताको कार्यक्रम आज सम्पन्न भएको हो।
मेयर कप ब्याडमिन्टन प्रतियोगितामा `ए´, `बि´ र भेट्रान्स गरि ३ वटा समुह बीच खेल भएको हो। जसमा समुह `ए´ अन्तर्गत जइन राई र रिदम कार्की प्रथम, नुनिराम राई र बिवस शाह दोस्रो, सुशील तिम्सिना, भगत राई, सन्देश तामाङ र इन्द्र राई (४ जना) तेस्रो हुनु भएको छ। बिजेता टिमलाई नगद रु. क्रमश: १० हजार, ८ हजार, ६ हजार, शिल्ड, मेडल र प्रमाणपत्र प्रदान गरिएको छ। त्यसैगरी समुह `बि´ अन्तर्गत मदन राई र नेपाल धन राई प्रथम, राजेश मण्डल र तारा खड्का दोस्रो र पदम राई,सत्य नारायण चौधरी, नमस कार्की र भानु भण्डारी तेस्रो हुनु भएको छ भने भेट्रान्स तर्फ लिला कान्त चौधरी र लक्ष्मी नारायण चौधरी प्रथम, मदन राई र चन्द्र मणि मण्डल दोस्रो अनि तारा मगर, युवराज आचार्य, नमस कार्की र भानु भण्डारी तेस्रो हुनु भएको छ। समुह `बि´ र भेट्रान्स तर्फको बिजेता टिमलाई क्रमश नगद रु. ८ हजार, ६ हजार, ५ हजार, शिल्ड मेडल र प्रमाणपत्र प्रदान गरिएको छ।
आजको फाइनल खेल पछि पुरस्कार वितरण तथा समापन कार्यक्रममा बेलका नगरपालिकाका नगर प्रमुख एवं कार्यक्रमको प्रमुख अतिथि अशोक कार्कीले सबै खेलाडीहरुले इमानदारीपूर्वक खेल खेलेर प्रतियोगितालाई भब्य रुपमा सम्पन्न गर्नु भएकोमा खुसी र धन्यवाद व्यक्त गर्दै आगामी दिनहरुमा खेलको लागि नगर सरकारले सक्दो सहयोग गर्ने प्रतिबद्ध जाहेर गर्नु भयो। त्यसैगरी बेलका नगर युवा तथा खेलकुद बिकास समितिका अध्यक्ष गोपिलाल राई ले फुटबल र ब्याडमिन्टन प्रतियोगिता मात्रै नभएर अरु पनि थुप्रै विधाका खेलहरुको आयोजना गर्ने सोच र चाहना भएता पनि नगरबाट कम बजेट छुट्टीएको ले अन्य खेलको प्रतियोगिताहरु संचालन गर्न नसकेको बताउनु भयो। जसको लागि बेलका नगर सरकारले अझ खेल क्षेत्रको लागि लगानी गर्नु पर्ने माग राख्दै आउने दिनहरुमा अन्य विधाका खेलहरु समेत आयोजना गर्ने बताउनु भयो।
