अजम्बर पुलामी-
१३ माघ, बेलका / उदयपुरको बेलका नगरपालिका-९ रामपुरस्थित मर्निङ ग्लोरी इङ्ग्लिश बोर्डिङ स्कुलमा ३० औँ वार्षिक खेलकुद प्रतियोगिता सुरु भएको छ। स्कुल परिसरमा आज मंगलबारबाट सुरु भएको प्रतियोगिताको उद्घाटन बेलका नगरपालिकाका प्रमुख अशोक कार्कीले गर्नुभएको हो।
उद्घाटन कार्यक्रममा बोल्दै नगरप्रमुख कार्कीले स्कुलले शैक्षिक क्रियाकलापसँगै खेलकुदलाई पनि समान महत्त्व दिएकोप्रति खुशी व्यक्त गर्नुभयो। उहाँले खेलकुदको ग्रासरुट स्कुल तहबाटै सुरु हुनुपर्ने बताउँदै सबै विद्यालयले खेलकुदलाई प्राथमिकता दिन सके देशले प्रतिभावान खेलाडी पाउने उल्लेख गर्नुभयो।
त्यसैगरी स्कुलका प्रधानाध्यापक अशोक तामाङले यस्ता प्रतियोगिताले विद्यार्थीभित्र लुकेका खेल प्रतिभा पहिचान र प्रस्फुटन गर्न सहयोग पुग्ने बताउनुभयो। ग्रासरुटदेखि राष्ट्रिय स्तरसम्म खेलकुद विकासमा यसले महत्त्वपूर्ण योगदान पुर्याउने उहाँको भनाइ थियो।
कार्यक्रमको अध्यक्षता स्कुलका संस्थापक भूषण राईले गर्नुभएको थियो। कार्यक्रममा प्रमुख अतिथि नगरप्रमुख अशोक कार्की, विशेष अतिथि उप-प्रमुख जीरा राई, बेलका-९ का वडा अध्यक्ष भरत घिमिरे, शिक्षा तथा खेलकुद विकास शाखा प्रमुख हरि कटेल, खेलकुद विकास समिति संयोजक गोपिलाल राई लगायतको उपस्थिति रहेको थियो।
आजबाट सुरु भएको खेलकुद प्रतियोगिता चार दिनसम्म सञ्चालन हुनेछ। प्रतियोगितामा ४० वटा विभिन्न खेलहरु समावेश गरिएको स्कुलले जनाएको छ।
