मंसिर ३, बेलका । दोस्रो जिल्ला स्तरीय उप–मेयर पुरुष क्रिकेट प्रतियोगितामा सहभागिताका लागि बेलका नगरको टिम छनोट प्रक्रिया आज सम्पन्न भएको छ। बेलका नगर युवा तथा खेलकुद विकास समितिको आयोजनामा गरिएको प्रथम चरणको छनोट बिहान ८ बजेदेखि वडा नम्बर ६ स्थित बुद्धचौक खेलमैदानमा सञ्चालन गरिएको थियो।
जम्मा २७ जना सहभागी खेलाडी मध्येबाट १९ जना खेलाडी दोस्रो चरणका लागि छनोट गरिएको समितिले जानकारी दिएको छ। समितिका अध्यक्ष गोपीलाल राई, सचिव दिपेन राना, नगरका खेलकुद पदाधिकारी तथा उदयपुर जिल्लाका मुख्य प्रशिक्षक मिथुन ठाकुरको उपस्थितिमा खेलाडी छनोट कार्य सम्पन्न गरिएको हो। छनोट भएका खेलाडीलाई १५ दिनको प्रशिक्षण दिइने र त्यसपछि १७ खेलाडीको अन्तिम टिम घोषणा गरिने आयोजकको भनाइ छ।
आगामी प्रतियोगिता बेलका नगरस्तरीय लेकाली रंगशालामा आयोजना हुने बताइएको छ। खेलको मिति भने चाँडै सार्वजनिक गर्ने तयारी भइरहेको नगर खेलकुद सचिव तथा क्रिकेट संयोजक दिपेन रानाले बेलका एफ.एम. लाई जानकारी दिनु भयो।
