चैत २७। उदयपुरको ब्रदरहुड एफसी इलामको सन्दकपुर देउरालीमा जारी पॉचौ सन्दकपुर गोल्डकपको सेमिफाइनलमा प्रवेश गरेको छ ।
सात खाल्डे सहिद खेल मैदानमा आज बुधबार सम्पन्न तेस्रो क्वाटर फाइनलमा चुलाचुली स्पोर्टिङ क्लब दमक झापालाई एकका विरूद्ध तीन गोलले पराजित गर्दै ब्रदरहुड सेमिफाइनलमा प्रवेश गरेको हो।
पहिलो हाल्फको ३०औँ मिनेटमा अनिष आर डी को गोल संगै अग्रता बनाएको चुलाचुलीले दोस्रो हाल्फमा भने तीन गोल खान पुग्यो । खेलको ६५औँ मिनेटमा ब्रदरहुडका प्रवेश दनुवारले गोल गर्दै खेललाई बराबरी मा पुर्याए ।
दोस्रो हाल्फकै ७८ र ८६ मिनेटमा ब्रदरहुडका क्याप्टेन आकास राईले थप दुइ गोल गर्दै अग्रता तेब्बर गरे । इन्जुरी समयको अन्तिम मिनेटमा चुलाचुलीका अनिष आर डीले थप गोल गर्दै अन्तर छोट्याए पनि हार टार्न भने सकेनन ।
खेलको म्यान अफ दि म्याच ब्रदहुडका आकाश राई घोषित हुँदै दुइ हजार पॉच सय सहित ट्रफि प्राप्त गरे ।
भोली चैत्र २८ गते बिहीबार चौथो तथा अन्तिम क्वाटर फाइनलमा बुट्टाबारी फुटबल क्लब झापा र वाइवाइ पॉचथर फुटबल क्लब बिच प्रतिस्पर्धा हुनेछ ।
सन्दकपुर गाउँपालिका ३ देउराली स्थित सात खाल्डे सहिद खेलमैदानमा चैत्र २५ गते देखि सुरू प्रतियोगिता वैशाख १ गते सकिनेछ ।
देउराली स्पोर्टिङ क्लबको आयोजना तथा सन्दकपुर गाउँपालिकाको संरक्षकत्वमा सन्चालित प्रतियोगिताको विजेताले नगद २ लाख ५५ हजार र आकर्षक ट्रफी प्राप्त गर्नेछ ।
आयोजक समितिका अध्यक्ष अइन्द्र राईका अनुसार उपविजेताले नगद १ लाख ५५ हजार र ट्रफी पाउने छ भने प्रत्येक खेलको म्यान अफ दी म्याचले नगद २ हजार ५ सय प्राप्त गर्नेछ ।
व्यक्तिगत विधातर्फ उत्कृष्ट गोलरक्षक, उत्कृष्ट डिफेन्डर, उत्कृष्ट फर्वाडर,उत्कृष्ट मिडफिल्डर,सर्वाधिक गोलकर्ता र उत्कृष्ट कोचले जनही ४-४ हजार पाउने आयोजक समितिका उपाध्यक्ष सुरेश थापा मगरले जानकारी दिए ।
उनका अनुसार प्रतियोगितामा पॉचथर,इलाम, झापा,मोरङ,र उदयपुरका ८ टिमको सहभागिता रहको छ। जसमा इलामको आयोजक देउराली स्पोर्टिङ क्लब, रेड हर्ष एफसी, बुट्टाबारी युनाइटेड झापा,चुलाचुली स्पोर्टिङ क्लब झापा,डॉगिहट एफसी मोरङ,कोशी प्रदेश प्रहरी तालिम केन्द्र बिराटनगर,वाइ वाइ पॉचथर फुटबल क्लब र ब्रदरहुड एफसी उदयपुर रहेका थिए।
आयोजक देउरीली स्पोर्टिङ क्लब,कोशी प्रदेश प्रहरी तालीम केन्द्र बिराटनगर र चुलाचुली स्पोर्टिङ क्लब दमक झापा भने प्रतियोगिताबाट बाहिरी सकेका छन।
स्रोत : गोल नेपाल डट कम
